٤ مشاهد للزواج في مصر
المشهد الاول : مي كساب ٣٤ سنة اتجوزت اوكا اللي هو اصغر منها ب ١٠ سنين ...اوكا لما كان في ٦ ابتدائي كان بيتفرج علي مسلسل تامر وشوقية اللي كانت بتمثل فيه مي كساب دور البطولة " شوقية "
الاتنين حبوا بعض واتجوزوا رغم كل الكلام والتريقه عليهم ورغم فرق السن الكبير
المشهد التاني : الاعلامي المحترم يسري فودة مرضيش يتجوز عشان كبر في السن ... الجواز بالنسبة ليه مكنش هدف بس وسيلة وكتب مقال عن الموضوع ده عنوانه " لماذا لا اريد ان اتزوج " .. وهو عندة ٥٢ سنة اخيرا لقي الانسانة اللي صبر كل دة عشان يلاقيها وقريبا جدا هيتجوز من المذيعة ألمي العنتابلي
المشهد التالت : عمرو يوسف الفنان الرائع اللي نص بنات مصر هيتهبلوا عليه .. اللي بنات كتير نفسهم يسألوه " ايه اللي يثبتلي انك بجد " .. عمرو يوسف حب كنده علوش رغم ان عندها ٣٤ سنة ورغم انها اتجوزت لمدة ٨ سنين .. هو بيحبها ومفرقش معاه اي حاجة
المشهد الرابع : محمد محسن عنده ٣٤ سنة اتجوز اجمل فنانة مصرية هبة مجدي .. محمد محسن مسمعش كلام الناس وهو عندة ٣٠ سنة انه لازم يتجوز عشان كبر وعشان يشوف اولادة وهما بيتجوزوا والهبل ده .. هو اتجوز لما لقي هبة مجدي اللي قال عليها " انا لقيت فيها حاجات كتير مني "
اوعي تتجوز او تتجوزي عشان كبرت
اوعي تتجوز او تتجوزي عشان الاهل بيضغطوا عليكم
لو عندك ٣٥ سنة وحاسس انك كبير شوف مثل يسري فودة
لو عندك ٣٠ سنة ممكن جوزك المستقبلي يكون في تانية ثانوي وبكرة عنده امتحان كيمياء في الدرس وبيذاكر ربنا يوفقه
الجواز مش عملية حسابية .. الجواز هي كيمياء الحب والتفاهم والتوافق
