انا مؤمن بإن لحظة ولادتنا هي أصدق لحظة بنمر بيها في حياتنا زي لحظة الموت بالظبط ، هي كمان لحظة صادقة بتكون فيها صريح مع نفسك، اصلك مش عارف الدقيقة الجاية انت عايشها ولا رايح، فـ يا باشا لا بتتكسف تعترف بغلطاتك ولا بتتكسف تقول إنك ظلمت حد في حياتك فـ بتعترف بكل حاجة الحلو و الوحش ، لحظة بجد صادقة لو حطيتها قدام عينيك طول الوقت هتراجع نفسك كتير في كل تصرف او خطوة بتخطيها، لحظة بتعترف فيها بحبك للناس وبتطلب منهم السماح والعفو ، مع بداية سنة جديدة من عمري عايز اقول إني بحب نفسي وبحب اللي بيحبوني وبحب اللي بيحبوا اللي بيحبوني، وحرفياً اللي يمشيلي خطوة امشيله بلاد
كل سنة جديدة بتمر علينا هي نعمة من نعم ربنا التي لا تُعد ولا تُحصى بيجدد روحنا وبيدينا امل في حاجات كتير ممكن تتعدل وتتصلح ، وأقدار ممكن تتغير ، علشان كدة الواحد دايماً بيدعي ربنا إنه يبدل قدره دايماً للأجمل و إنه يجعل مني شخص نافع معين للناس وقاضي حوائجهم ، يجعلني لين القلب وعفيف اللسان بقدر الإمكان والله بس أحنا بنتعامل مع بشرية صعبة الحقيقة وتحسهم طول الوقت بيحطوك في اختبارات نفاذ الصبر لمجرد إنهم شايفينك هادي، بتتحكم في افعالك وتصرفاتك، طموح وبتسعى طول الوقت ، هدوءك مش عاجبهم، يا اخي امسك مطوة وقلدهم ولا هات في سيرة الناس زيهم ولا حطم في الناس بكلامك ولا احسد ونظّر على الناس واحشر نفسك في حياتهم !
مع كل سنة بتتجدد أحلامي وطموحي اللي ملهاش سقف ، منها اللي اتحقق وده بفضل ربنا واللي لسة هيتحقق ، طول الوقت بنافس نفسي مش شاغل بالي بحد ولا عندي وقت لكدة، وقت الفراغ عندي بتعلم فيه حاجة جديدة تضيف ليا
الحل الوحيد في الوقت ده علشان تقدر تكمل هو إنك تعفو عن نفسك، تستوعب إن مفيش حاجة بإيدك مهما سعيت وحاولت تخلي كل حاجة مظبوطة .. مفيش حاجة هتمشي صح غير لما ربك يإذن، مهما تعبت وصدقت نيتك وعملك، الأمر في النهاية كله لله، مفيش حاجة متأخرة ولا حاجة حصلت كان المفروض متحصلش ولا في حاجة فاتتك، ومفيش حاجة مش من نصيبك كنت هتاخدها لو جريت أسرع، ومفيش حد مكتوبله يكمل معاك وهيمشي
