 |
مش أنت هتقدم ايه لبنتنا !
نسبة تصل لـ60%
من اللي اتجوزوا خلال آخر 3 سنين
كانوا عارفين انه هيفشل ولأسباب كتير
أهمها الظروف الأقتصادية
أدخلوا محاكم الأسر شوفوا الشباب أعمارهم قد ايه وبيتطلقوا
أحنا عندنا حالة زواج كل 34 ثانية و حالة طلاق كل 117 ثانية
و عندنا 88 % من نسبة الطلاق الموجودة في المحاكم المصرية لسنة 2023 بالخلع
أنت علشان ميتقالش عنك معيوب او يتقال عليكي معنسة وده لقب مرفوض فـ بتضطر تجرب حتى لو بأي حاجة
بتجرب في جوازة مش على مقاسك
بتجرب في جوازة مش من مستواك
بتجرب وأنت معندكش مصدر رزق
بتجرب وأنت ربع من مخك لاسع
بتجرب وانت عديم المسؤولية
بتجرب وأنت شهواني بتفكر في نفسك بس
بس اللي مبتفكرش فيه
إيجار شقتك اللي بيكون حوالي 2000 جنيه
كهرباء ومياه و غاز وانترنت حوالى 800 جنيه
مصاريف أكل وشرب حوالى 5000 جنيه ده علشان يا دوب تعرف تطلع السلم ومتنهجش
خروجات 300ج كل اسبوع انت ومراتك × 4 أسابيع بـ 1200ج
لبس مواسم ليك ولزوجتك واطفالك بعد كدة
وهتدخل على مرحلة الطفولة والخلفة
وبعدها مرحلة المدارس والتعليم
وطبعاً احتياجات اولادك اللي مش هينفع تقول عليها لأ
ولا ينفع تحملهم مسؤولية انك جبتهم للدنيا
طبعاً علشان أنت راجل أبن أصول وقد الشيلة
يعني انت عايز في الشهر ما لا يقل عن 10 الاف جنيه علشان يا دوب تقدر تعيش
تتجوز أزاي بقى بـ الـ 2700 جنيه ؟ انا راضي ذمتك يا جدع ازاي !
طول عمره الجواز باكدچ على بعضه كدة
هتعرف تشيل الباكدچ كله هتنجح
مش هتعرف تعمل كدة يبقى هتطلق وهتتخلع
وهتدور تتمطوح في بلاد الله محدش هيعرفلك طريق
لإن سيادتك اتجدعنت وكتبت حاجات مجبتهاش ولا هتقدر تجيبها
فـ بتهرب زي الحرامية حتى لو مش دي أصولك اللي اتربيت عليها
بس انت هتبقى مضطر تعمل كدة
فـ صون نفسك ومتتجوزش إلا لو هتقدر تشيل الباكدچ كامل
وتتعامل مع دخلك على إنه في يوم من الأيام مش هيبقى ملكك
هيبقى ملك أولادك وبيتك
طبعاً الرزق بتاع ربنا بس خدوا بالأسباب
انتوا امكانياتكم محدودة
اللي قالك فترة العشرينات للجواز جاموسة ولا بيفهم حاجة
العشرينات فترة تحقيق الأحلام وإثبات الذات ، ولو لقيت ياعم جوازة مرتاحة اتجوز
إنما أنت عايز وانت مش معاك ازاي بقى !
فكر في غيرك مش في نفسك بس، بص لقدام.
