الواحد بيشوف شباب وناس كبيرة بتهدر وقت كبير جداً وملحوظ على الكافيهات والقهاوي
القهوة زمان كانت مكان بيجمع المثقفين والأدباء والشعراء وعلية القوم ، تاخد معلومة من هنا ، تشوف صحابك اللي واحشينك كل فترة ، تتبادلوا خبرات وتجارب حياتية ، إنما مش اسلوب حياه يومي عمال على بطال كدة ، ده حتى تضييع لفلوسكم على الفاضي ، اقل يوم بتنزل فيه القهوة بتصرف 20 جنيه في 30 يوم بنتكلم في 600 جنيه وأنت أساساً لا معاك شغل ولا بتروح جامعة ولا بتذاكر ، انت اصبحت شخص مستهلك على الفاضي و عبئ على كل اللي حواليك و غير كدة شخص مجرد من كل المسؤوليات ولا يُعتمد عليك
ارجوكم كفاية قعدات قهاوي ، اشغلوا وقتكم بحاجات مهمة ، اتعلموا كل المهارات اللي تيجي قدامكم ، اشتغلوا وانتوا بتدرسوا مش عيب والله ، دي اكتر حاجة تحسسك بقيمة نفسك هي الشغل ، ولو انت بتدرس حاجة اجبرت عليها ومش هتعرف تغير مجال دراستك هقولك معلش تعالى على نفسك وخد شهادتك في إيدك وبجانب دراستك اللي مش حاببها دعبس كدة واتعلم اي حاجة تانية بعيد عن مجالك بهدف انك أولاً تعمل فلوس وثانياً تعمل حاجة أنت اللي روحتلها برجليك وحاببها ، صدقني هتبدع فيها
عايز اقولك حتى لو سنك من 40 لـ 70 سنة فـ أنت قادر تفتح اليوتيوب و تبدأ تتعلم اي حاجة تيجي قدامك وصدقني هييجي وقت وهتنفعك حتى لو هتتعلم ازاي تعلم كيكة بالبرتقال زي نادية السيد
في حد هيقولي احنا مسحولين في الحياه وفي الشغل والبيت ، هقولك كلنا كدة أقسم بالله ومحدش مرتاح ودماغنا فرهدت من كتر التفكير في اللي جاي وفولان عمل وانا معملتش وده سبقني وعمل معرفش ايه وانا لسة ، ومع ذلك بنجري على الحاجة اللي بنلاقي فيها شغفنا وبنحبها وبنعملها بكل متعة
لو فكرنا شوية هنلاقي إن المسألة كلها بتتمحور في عملية الرضا ، لو بصيت حواليك هتلاقي نفسك غرقان في نعم لا تُعد ولا تحصى .. اقسملك بالله لو رضيت هتلاقي ربنا جابلك الدنيا كلها تحت رجليك ازاي متعرفش ، اتقي الله في معاملتك مع الناس وفي رزقك وفكر في اهلك ازاي بيصرفوا عليك في ظل الظروف دي ، وراعي ضميرك ومتستناش شكر ولا ثناء من حد وقوي علاقتك بربنا جداً دي قبل كل حاجة
عايز اقولك هنفضل طول حياتنا مسحولين و مش هنرتاح غير لما نعمل حاجة تغير حياتنا للأحسن وتحسسنا بقيمتنا
احنا داخلين في مواجهة شرسة مع الغرب وادواتنا في الحرب هي الوعي والمعرفة والعمل الجاد
قلل نومك ، واصحى بدري ، وحب كل حاجة بتعملها في حياتك لإن في ناس محرومة من اساسيات حياتها مش الرفاهيات كمان
الموضوع محتاج وقفة بجد جوة كل واحد فينا ، انتفض من جواك وغير روتين حياتك ، طول ما انت لسة بتتنفس يبقى لسة في مليون امل
