عايزين نراعي الناس اللي مبتعرفش تبين زعلها او حزنها قدام حد فـ بيظهروا دايماً إنهم مبيحسوش ومعندهومش دم وكل الكلام ده
لو سألتك انت بتشوف بعينك ولا قلبك هتكون إجابتك ايه ؟
طبعاً بتشوف بعينيك مش محتاجة كلام
بس في الزمن ده في حاجات لو شوفتها بعينيك كدبها وشوفها بقلبك ، هتلاقي صورة أوضح بكتير
حد ضايقك بكلمة ، بترد عليه ، بترجع بيتك تفكر في الكلام وتتضايق إنك معرفتش تعبر عن حالة الغضب اللي جواك
في الجنازة أو العزاء دايماً بنركز على اقرب واحد للمتوفي ، ابنه بنته صاحبه اخوه اخته ابوه او امه ، في بعض المشاهد بنشوف اقرب الناس منهارين من البكاء ، وفي مشاهد تانية بنلاقي ملامح خشب مجردة من المشاعر ، هي اكيد مش كدة بس بيبان لك إنها كدة
ده بيرجع لتكوين الشخصية ، في نوع من الناس هما وقت الموقف مبيعرفوش يعيطوا ، هما مش متحكمين في القصة دي لإن في مواقف انت لو معيطتش فيها هيتقال ان قلبك جامد وان الشخص ده مكانش فارق معاك ، بس هي مبتتحسبش كدة ، لان في نسبة كبيرة من البشر مش بيستوعبوا الموقف الا لما يكونوا لوحدهم ومع نفسهم بالليل في اوضتهم كدة ، وقتها بيبدأوا يسترجعوا كل الذكريات وفعلاً بينهاروا من البكاء
فـ خليك رحيم وبلاش تحكم على الموقف طالما مدخلتش جوة الناس
